Frétt frá ríkissáttasemjara

Fyrsti fundur Kjaratölfræðinefndar var haldinn í húsakynnum ríkissáttasemjara í dag.

Samkomulag um stofnun Kjaratölfræðinefndar var undirritað þann 15. maí sl. en hún er samstarf heildarsamtaka á vinnumarkaði, ríkis og sveitarfélaga um undirbúning og eftirfylgni kjarasamninga. Markmiðið er að aðilar samkomulagsins hafi sameiginlegan skilning á þeim hagtölum sem mestu máli skipta við gerð kjarasamninga.

Aðild að nefndinni eiga forsætisráðuneyti, félagsmálaráðuneyti, fjármála- og efnahagsráðuneyti, Alþýðusamband Íslands, Bandalag háskólamanna, BSRB, Kennarasamband Íslands, Samband íslenskra sveitarfélaga, Samtök atvinnulífsins og Hagstofa Íslands.

Félags- og barnamálaráðherra skipar í nefndina til fjögurra ára í senn eftir tilnefningu þeirra sem eiga aðild að nefndinni. Þá skipar ráðherra formann nefndarinnar án tilnefningar. Ríkissáttasemjari hýsir nefndina og sér henni fyrir funda- og starfsaðstöðu.

Í gær var undirritaður kjarasamningur Félags prófessora við ríkisháskóla og Fjármála- og efnahagsráðherra fyrir hönd ríkissjóðs sem gildir til 31. mars 2023.

Atkvæðagreiðslu um samninginn lýkur föstudaginn 20. desember klukkan 14:00. Alls eru 363 félagsmenn á kjörskrá.

Kjaradeilum stéttarfélaga  sem gera kjarasamning við SA v/ISAL (Ríó Tintó Alcan)  hefur verið vísað til ríkissáttasemjara.

Annars vegar eru það RSÍ v/ Félags íslenskra rafvirkja og Félags rafeindavirkja, VM og FIT sem vísa sinni kjaradeilu við ofangreinda aðila og svo hins vegar Verkalýðsfélagið Hlíf og VR.

Boðað verður til fundar með samningsaðilum innan tíðar.

Félagar í Blaðamannafélagi Íslands felldu kjarasamning sem undirritaður var föstudaginn 22. nóvember sl.

Á kjörskrá voru 380 og atkvæði greiddu 147 eða 38,7%.

Atkvæði féllu þannig að já sögðu 36,eða 24,5%,  nei sögðu 105 eða 71,4% og auðir seðlar voru 6 eða 4,1%.

Fundur hefur verið boðaður hjá ríkissáttasemjara kl. 15.00 í dag.

Fyrsti fundur nýs Þjóðhagsráðs var haldinn í Ráðherrabústaðnum í dag en samkomulag um hlutverk og umgjörð Þjóðhagsráðs var undirritað þann 18. júní síðastliðinn.

Markmið Þjóðhagsráðs er að styrkja samhæfingu hagstjórnar og ákvarðana á vinnumarkaði með hliðsjón af efnahagslegum og félagslegum stöðugleika og áhrifum á loftslagsmál. Í Þjóðhagsráði sitja forsætisráðherra, fjármála- og efnahagsráðherra, samgöngu- og sveitarstjórnarráðherra, formaður Sambands íslenskra sveitarfélaga, seðlabankastjóri, forseti ASÍ, formenn BSRB, BHM og KÍ og framkvæmdastjóri SA.

Á fundinum í dag var rætt um hagstjórn, velsældarmælikvarða, greiðsluþátttöku sjúklinga og græna skatta.

Blaðamannfélag Íslands hefur boðað vinnustöðvun vegna félagsmanna sem starfa hjá Árvakri, Ríkisútvarpinu, Sýn og Torgi.

Vinnustöðvunin er tímabundin og framkvæmist svo:

Ljósmyndarar og tökumenn hjá ofangreindum atvinnurekendum og blaða- og fréttamenn á netmiðlum þeirra (mbl.is, visir.is, frettabldid.is og ruv.is) munu leggja niður störf á neðangreindum tímum:

föstudaginn 8. nóvember 2019 klukkan 10:00-14:00

föstudaginn 15. nóvember 2019 klukkan 10:00-18:00

föstudaginn 22. nóvember 2019 klukkan 10:00-22:00

Blaðamenn sem starfa við prentútgáfu Morgunblaðsins og Fréttablaðsins auk ljósmyndara og tökumanna munu leggja niður störf fimmtudaginn 28. nóvember 2019 klukkan 10:00-22:00.

Á kjörskrá voru 211 félagsmenn. Atkvæði greiddi 131. Verkfallsboðun var samþykkt með 109 atkvæðum, eða 83,2% greiddra atkvæða.

Samband íslenskra sveitarfélaga hefur vísað tveimur málum til ríkissáttasemjara. Annars vegar gegn Starfsgreinasambandi Íslands og hins vegar gegn Eflingu – stéttarfélagi.

Kjarasamningar aðila hafa verið lausir síðan 31. mars 2019.

Félag íslenskra atvinnuflugmanna (FÍA) boðaði vinnustöðvun þann 22. október vegna flugmanna sem starfa hjá Air Iceland Connect.

Vinnustöðvunin felur í sér yfirvinnubann meðal allra flugmanna Air Iceland Connect, en þeir eru allir félagsmenn í FÍA. Yfirvinnubannið nær til allra verkefna flugmanna fyrir félagið sem teljast til yfirvinnu. Þannig fellur niður vinna samkvæmt tveimur ákvæðum kjarasamnings aðila; annars vegar um heimild félagsins til að kaupa vinnu af flugmanni á frídegi og hins vegar til að kaupa viðbótar vakttíma af flugmanni á vinnudegi.

Vinnustöðvunin er ótímabundin og mun hún hefjast klukkan 00:01 föstudaginn 1. nóvember 2019.

Á kjörskrá voru 40 félagsmenn FÍA. 34 þeirra greiddu atkvæði. Já sögðu 32 eða 94,12%. Einn greiddi atkvæði gegn vinnustöðvun og einn seðill var auður eða ógildur.

Á fjórða tímanum í nótt var undirritaður kjarasamningur á milli fimm aðildarfélaga Bandalags háskólamanna og Fjármála- og efnahagsráðherra fyrir hönd ríkissjóðs. Félögin sem um ræðir eru Félag háskólamenntaðra starfsmanna Stjórnarráðsins, Félag íslenskra félagsvísindamanna, Fræðagarður, Stéttarfélag bókasafns- og upplýsingafræðinga og Stéttarfélag lögfræðinga.

Samningurinn gildir til 31. mars 2023.

Á síðustu dögum hafa embætti ríkissáttasemjara borist 19 vísanir nýrra sáttamála aðildarfélaga BSRB gagnvart þremur viðsemjendum; Fjármála- og efnahagsráðherra fyrir hönd ríkissjóðs, Sambandi íslenskra sveitarfélaga og Reykjavíkurborg. Kjarasamningar aðila losnuðu 31. mars síðastliðinn.