Ríkissáttasemjara hefur borist tilkynning um vinnustöðvun meðal félagsmanna VR sem starfa á fyrirtækjum í gistiþjónustu og hjá hópbifreiðafyrirtækjum. Vinnustöðvunin mun hefjast þann 22. mars nk nema kjarasamningar hafi tekist fyrir þann tíma.
Ríkissáttasemjara barst í gær tilkynning um vinnustöðvanir tiltekins hóps félagsmanna Eflingar – stéttarfélags. Um er að ræða bæði tímabundnar og ótímabundnar vinnustöðvanir félagsmanna Eflingar sem starfa á hótelum, hjá rútufyrirtækjum og hjá Almenningsvögnum kynnisferða.
Vinnustöðvanir munu hefjast þann 18. mars náist ekki samningar fyrir þann tíma.
Atkvæðagreiðslu um tímabundna vinnustöðvun félagsmanna Eflingar lauk þann 28. febrúar. Á kjörskrá voru 7950 félagsmenn. Atkvæði greiddu 862. Samþykkir verkfallsboðun voru 769 og var tillaga um verkfallsboðun því samþykkt með 89% greiddra atkvæða. Vinnustöðvunin tekur til þrifa, hreingerninga og frágangs herbergja og annarrar gistiaðstöðu á hótelum og gistihúsum.
Vinnustöðvunin mun hefjast klukkan 10:00 að morgni 8. mars 2019 og henni mun ljúka þann sama dag klukkan 23:59 nema kjarasamningar takist fyrir þann tíma.
Nýju sáttamáli hefur verið vísað til ríkissáttasemjara. Þetta er mál Samflots iðnaðarmanna og Samtaka atvinnulífsins. Að samfloti iðnaðarmanna standa Rafiðnaðarsamband Íslands, Samiðn, Matvís, VM félag vélstjóra og málmtæknimanna, Grafía, Byggiðn og FHS félag hársnyrtisveina.
Tvö ný mál eru nú til meðferðar hjá ríkissáttasemjara. Þetta eru mál 16 aðildarfélaga Starfsgreinasambandsins og SA sem vísað var til meðferðar 21. febrúar, og mál Landsambands íslenskra verslunarmanna (að undanskildu VR) og SA sem vísað var 22. febrúar. Í báðum tilfellum runnu kjarasamningar aðila út þann 31. desember sl.
Samningafundi Eflingar, VLFA, VLFG og VR og SA sem hófst klukkan 14:00 er lokið. Annar fundur hefur ekki verið boðaður.
Ríkissáttasemjari hefur tilnefnt hóp aðstoðarsáttasemjara á grundvelli heimildar í 4. mgr. 20. gr. laga um stéttarfélög og vinnudeilur nr. 80/1938, en þar segir að ríkissáttasemjari geti tilnefnt aðstoðarsáttasemjara til að aðstoða sig við lausn vinnudeilu eða vinna sjálfstætt að lausn einstakrar vinnudeilu. Framvegis mun einn eða fleiri úr þeim hópi vera kallaður til aðstoðar í hverju sáttamáli ásamt ríkissáttasemjara. Markmið breytinganna er að bæta þjónustu embættisins við aðila vinnumarkaðarins, með því að efla sáttamiðlun og stuðla að aukinni skilvirkni embættisins við kjarasamningagerðina.
Hóp aðstoðarsáttasemjara skipa:
Aðalsteinn Leifsson Framkvæmdastjóri hjá EFTA
Ástráður Haraldsson Héraðsdómari
Bergþóra Ingólfsdóttir Héraðsdómari
Elín Blöndal Lögfræðingur og markþjálfi
Elísabet S. Ólafsdóttir Skrifstofustjóri ríkissáttasemjara
Guðbjörg Jóhannesdóttir Sóknarprestur og MA í sáttamiðlun
Helga Jónsdóttir Lögfræðingur
Ingibjörg Þorsteinsdóttir Héraðsdómari
Jóhann Ingi Gunnarsson Sálfræðingur og ráðgjafi
Kristín Ingólfsdóttir Fyrrverandi rektor Háskóla Íslands
Magnús Jónsson Fyrrverandi Veðurstofustjóri
Þórður S. Gunnarsson Lögmaður
Þetta eru öflugir einstaklingar sem hafa mikla reynslu í farteskinu ýmist á sviði sáttamiðlunar, samningatækni, ráðgjafar, vinnuréttar eða stjórnunar sem án efa getur nýst vel við samningaborðið. Hópurinn hefur hist í tvígang og setið námskeið hjá okkur til að undirbúa sig undir verkefnið. Ég tel að einstaklega vel hafi tekist til við að manna þennan hóp og hlakka mikið til að vinna með þeim.
Bryndís Hlöðversdóttir, ríkissáttasemjari
Nánari kynning á sáttasemjurunum og bakgrunni þeirra verður birt hér á heimasíðu embættisins von bráðar.
Samninganefndir Flugvirkjafélags Íslands og Bluebird undirrituðu kjarasamning í húsakynnum ríkissáttasemjara á öðrum tímanum í dag. Málinu var vísað til ríkissáttasemjara þann 9. nóvember 2018 og voru haldnir 6 fundir í málinu.
Nýi samningurinn gildir frá 1. febrúar 2018 til 1. febrúar 2021.
Ríkissáttsemjari minnir á að samkvæmt 23. grein laga 80/1938 um stéttarfélög og vinnudeilur skulu viðsemjendur skila viðræðuáætlun til ríkissáttasemjara eigi síðar en 10 vikum áður en samningar renna út. Þann 31. mars renna 152 samningar út og er síðasti skiladagur viðræðuáætlana vegna þeirra föstudagurinn 18. janúar.
Nýju sáttamáli var vísað til ríkissáttasemjara í dag; máli Verkalýðsfélags Grindavíkur og Samtaka atvinnulífsins. Málið er það fyrsta sem vísað er til ríkissáttasemjara á árinu 2019.