Samninganefndir Eflingar og Reykjavíkurborgar undirrituðu kjarasamning í húsakynnum ríkissáttasemjara á fjórða tímanum í nótt. Samningurinn tekur til um 1850 félagsmanna Eflingar. Verkfalli Eflingar, sem hófst með eins og tveggja daga verkföllum í febrúar en hefur staðið yfir ótímabundið frá 17. febrúar hefur verið aflýst.
Samninganefndir Sjúkraliðafélags Íslands og fjármála- og efnahagsráðherra fyrir hönd ríkissjóðs undirrituðu kjarasamning á áttunda tímanum í morgun. Verkfallsaðgerðum Sjúkraliðafélagsins gagnvart ríkinu hefur verið aflýst.
Samninganefndir Sjúkraliðafélags Íslands og Sambands íslenskra sveitarfélaga undirrituðu kjarasamning á sjötta tímanum í nótt. Verkfalli félagsmanna sem starfa hjá Akureyrarbæ og átti að hefjast klukkan 8:00 hefur verið aflýst.
Bæjarstarfsmannafélög innan BSRB undirrituðu kjarasamning við fjármála- og efnahagsráðherra fyrir hönd ríkissjóðs á sjötta tímanum í nótt. Verkfallsaðgerðum félaganna gagnvart ríkinu hefur verið aflýst. Félögin sem undirrituðu kjarasamninginn eru Kjölur, stéttarfélag starfsmanna í almannaþjónustu, Félag opinberra starfsmanna á Austurlandi, Félag opinberra starfsmanna
á Vestfjörðum, Starfsmannafélag Dala- og Snæfellssýslu, FOSS – stéttarfélag í almannaþjónustu, Starfsmannafélag Garðabæjar, Starfsmannafélag Fjallabyggðar, Starfsmannafélag Fjarðabyggðar, Starfsmannafélag Hafnarfjarðar, Starfsmannafélag Húsavíkur, Starfsmannafélag Kópavogs, Starfsmannafélag Suðurnesja og Starfsmannafélag Vestmannaeyja.
Samningurinn gildir til 31. mars 2023.
Samninganefndir Sameykis og fjármála- og efnahagsráðherra fyrir hönd ríkissjóðs undirrituðu kjarasamning um klukkan 5 í nótt. Verkfallsaðgerðum Sameykis gagnvart ríkinu, sem hófust á miðnætti hefur verið aflýst. Kjarasamningur nær til um 4000 félagsmanna Sameykis sem starfa hjá ríkinu. Samningurinn gildir til 31. mars 2023.
Samninganefndir Sameykis og Reykjavíkurborgar undirrituðu kjarasamning í húsakynnum ríkissáttasemjara á fjórða tímanum í nótt. Vinnustöðvunum félagsmanna Sameykis sem starfa hjá Reykjavíkurborg hefur verið aflýst.
Kjarasamningurinn tekur til rúmlega 4000 starfsmanna borgarinnar og gildir til 31. mars 2023.
Kjarasamningur hefur verið undirritaður á milli Sambands íslenskra sveitarfélaga og bæjarstarfsmannafélaga innan BSRB. Samhliða undirritun kjarasamningsins hefur vinnustöðvunum félaganna gagnvart Sambandi íslenskra sveitarfélaga verið aflýst.
Samningurinn tekur til um 7000 starfsmanna sveitarfélaga um allt land og gildir til 31. mars 2023.
Þau félög sem hafa undirritað kjarasamninginn og aflýst verkföllum gagnvart Sambandi íslenskra sveitarfélaga eru:
Kjölur, stéttarfélag í almannaþjónustu
Sameyki, stéttarfélag starfsmanna í almannaþjónustu
Samflot bæjarstarfsmannafélaga f.h. eftirtalinna stéttarfélaga,
Félag opinberra starfsmanna á Austarlandi
Félags opinberra starfsmanna á Vestfjörðum
Starfsmannafélag Dala- og Snæfellsnessýslu
Starfsmannafélag Fjallabyggðar
Starfsmannafélag Fjarðabyggðar
Starfsmannafélag Húsavíkur
Starfsmannafélag Vestmannaeyja
Samstarf 6 bæjarstarfsmannafélaga f.h. eftirtalinnna stéttarfélaga,
FOSS, stéttarfélag í almannaþjónustu
Starfsmannafélag Hafnarfjarðar
Starfsmannafélag Kópavogs
Starfamannafélag Mosfellsbæjar
Starfsmannafélag Suðurnesja
Kjarasamningur var undirritaður á milli Eflingar – stéttafélags og fjármála- og efnahagsráðherra fyrir hönd ríkissjóðs í húsakynnum ríkissáttasemjara í dag. Kjarasamningur aðila rann út þann 31. mars 2019. Alls starfa um 540 manns undir kjarasamningnum. Gildistími hans er til 31. mars 2023.
Í ljósi þess að neyðarstigi almannavarna var lýst yfir nú síðdegis hefur húsakynnum ríkissáttasemjara verið lokað öðrum en þeim sem þar þurfa að vera vegna þátttöku sinnar í kjarasamningagerð.
Samninganefnd Starfsgreinasambands Íslands, fyrir hönd 18 aðildarfélaga sambandsins, og samninganefnd ríkisins undirrituðu kjarasamning í húsakynnum ríkissáttasemjara í dag. Samningurinn gildir til 31. mars 2023.
Samningurinn verður borinn undir atkvæði félagsmanna og er ráðgert að atkvæðagreiðslu um hann ljúki 26. mars.
