Félags- og barnamálaráðherra hefur skipað Aðalstein Leifsson, framkvæmdastjóra hjá EFTA, í embætti ríkissáttasemjara frá 1. apríl næstkomandi. Helga Jónsdóttir, settur ríkissáttasemjari, mun gegna störfum þangað til.
Félagsmálaráðuneytið auglýsti embættið laust til umsóknar þann 5. desember 2019 og var umsóknarfrestur til og með 20. deseber 2019. Sex einstaklingar sóttu um embættið en ein umsókn var síðar dregin til baka. Félags- og barnamálaráðherra skipaði ráðgefandi nefnd til að meta hæfni umsækjenda um embættið. Niðurstaða nefndarinnar var sú að þrír umsækjendur væru jafnhæfir til að gegna embætti ríkissáttasemjara. Mat félags- og barnamálaráðherra er að af þeim þremur uppfylli Aðalsteinn best þær kröfur sem gerðar eru til þess sem skipaður verður í embættið.
Aðalsteinn lauk MBA námi frá Edinburgh Business School / Herriot Watt University í október 2004. Auk þess hefur hann lokið MSc námi frá London School of Economics (LSE). Þá stundaði hann doktorsnám í samningatækni hjá Greneoble Ecole de Management samhliða vinnu á árunum 2016-2018. Frá því í janúar 2014 hefur Aðalsteinn leitt daglegan rekstur EFTA sem hefur starfstöðvar í Genf, Brussel og Luxemburg og tæplega eitt hundrað starfsmenn. Einnig hefur hann leitt skrifstofu aðalframkvæmdastjóra EFTA.
Samhliða starfi sínu hjá EFTA hefur Aðalsteinn starfað sem lektor við Háskólann í Reykjavík þar sem hann hefur meðal annars kennt samningatækni og lausn deilumála í MBA námi og í meistaranámi innan hinna ýmsu deilda skólans.
Aðalsteinn hefur gegnt starfi aðstoðarsáttasemjara frá janúar 2019.