Boðaðar vinnustöðvanir 2008-2016


Á árunum 2008-2016 voru boðaðar vinnustöðvanir í 101 þeirra sáttamála sem voru til meðferðar hjá ríkissáttasemjara á tímabilinu. Í 48 málum komu vinnustöðvanir til framkvæmda.

Séu boðaðar vinnustöðvanir skoðaðar með hliðsjón af heildarsamtökum launafólks kemur í ljós að flestar vinnustöðvanir voru boðaðar af félögum innan BHM, eða 29%. Næst flestar vinnustöðvanir voru boðaðar af félögum ASÍ, 25%, 8% af KÍ, 6% af BSRB en stærstur hluti vinnustöðvana var boðaður af félögum utan heildarsamtaka, 33%.

Séu boðaðar vinnustöðvanir greindar út frá launagreiðendum kemur í ljós að í 48% tilvika beindist vinnustöðvun að aðilum innan SA. Í 36% tilvika beindist boðun vinnustöðvunar gegn íslenska ríkinu, í 10% tilvika gegn sveitarfélögum, og í 7% tilvika gegn öðrum launagreiðendum.

Vinnustöðvanir 2008-2016

Sé litið til vinnustöðvana sem komu til framkvæmda og þær greindar út frá heildarsamtökum launafólks má sjá að flestar vinnustöðvanir voru hjá félögum innan BHM, eða 40%. Félög innan ASÍ stóðu fyrir 17% vinnustöðvana, KÍ fyrir 8% og félög innan BSRB fyrir 2%. Félög utan heildarsamtaka stóðu fyrir 33% vinnustövana á tímabilinu.

Ef vinnustöðvanir eru greindar með hliðsjón af launagreiðendum kemur í ljós að langflestar þeirra beindust gegn íslenska ríkinu, eða 59%. Næstflestar vinnustöðvanir beindust gegn aðilum innan SA, eða 35%, 2% gegn sveitarfélögum og 4% gegn öðrum launagreiðendum.