Ríkissáttasemjari

Félag skipstjórnarmanna hefur vísað kjaradeilu sinni við SA v/Eimskips, til ríkissáttasemjara, vegna yfirmanna á Herjólfi. Kjaradeila vélstjóra á Herjólfi sem hefur verið til meðferðar hjá sáttasemjara, leystist í gær og var boðuðu verkfalli aflýst.

 

Fréttatilkynning frá ríkissáttasemjara

9. nóvember 2011

 

Kjarasamningar gerðir við nánast alla launþega í landinu

Kjarasamningar vinnuveitenda og stéttarfélaga launþega hafa nú verið gerðir fyrir nær alla launþega í landinu. Samningar á almennum vinnumarkaði gilda jafnan til janúar 2014 með fyrirvara um endurskoðun breytist forsendur samninganna að mati samningsaðila. Samningar ríkisins gilda yfirleitt til marsloka 2014 og samningar sveitarfélaga til mars, júní eða septemberlok 2014.

Samtök atvinnulífsins, sem semja fyrir hönd þorra fyrirtækja á almennum vinnumarkaði, hafa lokið öllum samningum ef frá eru taldir örfáir samningar í flugþjónustu, við lyfjafræðinga og starfsmenn í ferjurekstri.

Ríkið semur við stéttarfélög opinberra starfsmanna og hefur lokið samningum við langflesta viðsemjendur sína. Allir samningar sem falla undir stéttarfélög sem tilheyra BSRB, BHM, KÍ og ASÍ  eru frágengnir.  Níu samningar eru ógerðir við starfsmenn á skipum Hafrannsóknarstofnunar, hjá Landhelgisgæslu og Þjóðleikhúss.

Samband íslenskra sveitarfélaga hefur lokið öllum kjarasamningum á þess vegum en sambandið semur fyrir hönd flestra sveitarfélaga í landinu.

Reykjavíkurborg gerir samninga við ýmsa starfsmannahópa í þjónustu borgarinnar og er þeim öllum lokið.

Á árinu hefur 61 kjaradeilu verið vísað til sáttameðferðar hjá ríkissáttasemjara. Öll eru þessi mál leyst að 3 frátöldum. Í nokkrum tilfellum hafa samningar verið felldir og þeir komið til áframhaldandi umfjöllunar hjá sáttasemjara. Á þetta t.d. við um samninga atvinnuflugmanna, flugvirkja, flugfreyja og starfsmanna Ísal.

Samningsaðilum er skylt að senda ríkissáttasemjara afrit af öllum kjarasamningum sem gerðir eru. Til þessa hafa  tæplega 190 kjarasamningar gerðir á árinu verið skráðir hjá embættinu.

 

 

 

 

Starfsmannafélag Sinfóníuhljómsveitar Íslands og fjármálaráðherra f.h. ríkissjóðs undirrituðu nýjan kjarasamning 2. nóvember. Samningurinn gildir til 31. mars 2014.